![](https://www.lembach-online.at/wp-content/uploads/2024/01/1119.jpg?x92576)
Was is des eigantli: Weihnachtn?
Eine Weihnachtsgeschichte vom Mundartdichter Hans Dieter Mairinger
Was is des eigantli: Weihnachtn?
Is‘ a Kassa,
de dreimal sooft klinglt
als wia sunst im Jahr?
Is‘ a Wüawö in da Stadt,
daßd manst,
es is a Unglick gscheng,
a greßas?
Is‘ da Schnee,
der sche laungsaum awazuckat
und ois zuadeckt?
Is‘ da Schiurlaub in Kitz
vom Vierazwanzigstn au
bis üwa Süwesta?
Is‘ des „Stille Nacht,
heilige Nacht“,
des‘ olle viertl Stund spün
im Radio?
Was is‘ des eigantli:
Weihnachtn?
Sans de Bratwiaschtln
am Heilign Abnd
und da Truthau
am Fünfazwanzigstn?
Is‘ da Christbam
mit de vün Kerzln
und da Berg Geschenke?
Is‘ des Krippal
mit ana elektrischn
Beleichtung?
Is‘ de Erinnerung
an damals,
wiast nu kla warst?
Sans de vün Christbam
und Liachtln
draußn am Friedhof?
Oda is Weihnachtn
vielleicht gaunz was aundas?
Wer woaß?